Agar chain se sona hai to jaag jaao…
Global Speed aur Timesheet ki deadline ko na bhulao…
Appraisal aur H2 k aane se kaam hone ki gaatividhian tez
Saal samapti (H2) k appraisal k chalte chalte aajkal ke karamcharik tatva kaafi sakriye ho uthe hain. Industry aur account mein training, knowledge sharing sessions aur overtime ki gatividhiyan badti he ja rahin hain..Saath he bad raha hai client satisfaction index aur company ka sensex.
Pareshan karamchariyon ne dee dhamki dikhaya akrosh
Aaj ki sansani khez khabar – vishesh sutro se paata chaala hai ki pauranik (legacy) system mein kaam karne waale production support k kuch karamchariyon ko onsite na milne ke karan aaj char software engineerion ne apne steefe diye (paper dale)… account k mukhye upadhyaksh ki baithak ne ispe vichar vimarsh kiya aur kaha hai ki un karam chariyon k halat dekhte hue unhe project se release karne ki pratikriya shuru ki jaayegi. Saath mein yeh bhi paata chala hai ki un karam chaariyon ne kuch dino se khana peena badha diya tha aur kaam karna band kar diya tha.
Deadlines ka kahar
Deadlines na meet kar pane k karan aaj do project mein escalation ki khabar mili hai … paata laaga hai ki yeh project peechle do mahino se crisis mein chal rahe the … company k adhikariyon ki baithak ne yeh tai kiya hai ki is mamle ki ‘causal analysis’ duara jaanch jaayegi … kuch soochak tatvo se yeh bhi malum hua hai ki is project ka proposal banate waqt jo karamchari shaamil the unko takniki gyan k gyat aur effort estimation k baare mein poori taarah soochna nahi thi… gambhir mamla hote hue is project pe aur ache se acche karamchari lagane ki maang ki gaayi hai.
Yeh intezar kab khatam hoga
Kaafi samay se kaafi karamchaariyon ko har warsh ki tarah is warsh bhi promotion letter ka intezar hai …saabhi is taak mein baithe hain ki promotion hoga to kab hoga. Aseemit tankhwa (Variable pay) na milne se aur mandi k daur k chalte yeh karamchari pehle se hee kaafi dukhi aur pareshan the… ab dekhne waali baat yeh hai ki doosri company waale is baat ka faiyda utha kar karamchariyon ko acha package na de na bula lein. Company k ek prawakta ne bataya ki aage ke quarter mein steethian sudharne ki umeed hai lekin koi bhi ispe vishesh tippani nahi kar raha.
Ban gaaye star
Aaj himmat aur josh dikhate hue ek kharamchari ne client k dwara kiye gaaye escalation ko baadi buddhi aur sahas k saath mukabala karke ek khote hui project ko bachaya… company ke ucch adhikariyon ne is karamchari ko ‘Star of the Month’ k sheershak se sammanit kiya aur ‘gems’ bhi deeye… doosre account k kuchh uchh adhikari ab is karamchari k release hone ki ghaat lagaye baaithe hai…khabar yeh bhi mili hai ki yeh karamchari kaafi dino se onsite na milne aur tankhwa na badne ko lekar pareshan tha.
Aaaj k samachar bas itna tak … kal phir haazir honge naayi ‘IT’ khabron k saath… magar … agar chain se sona hai to jaag jaao Global Speed aur Timesheet ki deadline ko na bhulao…
No comments:
Post a Comment